БҮГД НАЙРАМДАХ ЧЕХ УЛСАД ХӨДӨЛМӨР ЭРХЛЭХЭЭР ТӨЛӨВЛӨЖ БУЙ ИРГЭДИЙН АНХААРАЛД
Бүгд Найрамдах Чех Улсад хөдөлмөр эрхлэх хүсэлтэй манай улсын иргэдийн тоо нэмэгдэхийн хэрээр өндөр цалинтай хөдөлмөрийн гэрээ гаргахад зуучилна, найдвартай виз гаргана зэргээр иргэдийг залилах, хууран мэхлэх, санхүү, эд материал, сэтгэл санаагаар хохироох явдал гарч байгаа тул хөдөлмөр эрхлэх зорилгоор Бүгд Найрамдах Чех Улсад ирэхээр төлөвлөж буй иргэд Та бүхэнд дараах зөвлөмжийг хүргэж байна.
Бүгд Найрамдах Чех Улсад хөдөлмөр эрхлэх гадаадын иргэд /үүний дотор Монгол Улсын иргэд/ чехийн ажил олгогчтой хөдөлмөрийн гэрээ байгуулахад төлбөр, мөнгө төлөх шаардлагагүй бөгөөд гадаадын иргэн нь тус улсын хуулийн дагуу гадаадын иргэнийг авч ажиллуулах хүсэлтэй ажил олгогчтойгоо шууд холбогдож, хөдөлмөрийн гэрээ байгуулж, түүнийхээ дагуу зохих ангиллын визийг мэдүүлэх боломжтой. Эдгээр бүх үйл ажиллагаанд сайн дурын үндсэн дээр харилцан тохиролцож, зөвшилцсөний үр дүнд дундын зуучлагч хэн нэгнээс туслалцаа авах тохиолдолд иргэн Та тухайн зуучлагчтай хуулийн дагуу эрх, үүргийг заасан гэрээ, хэлцэл байгуулж, төлбөр, хураамж төлөх тохиолдолд баримт үйлдэж байх шаардлагатай болно. Зохих зөвшөөрөл, визийг авч Бүгд Найрамдах Чех Улсад ирсний дараа хөдөлмөрийн гэрээ байгуулсан компанидаа хамгийн багадаа 6 сарын хугацаанд ажиллах шаардлагатай бөгөөд энэ хугацаанд өөрийн хүсэлтээр ажлаас халагдах, ажил олгогчоо солих боломжгүйг сайтар анхаарна уу.
Мөн том оврын тээврийн хэрэгслийн жолоочоор ажиллах иргэдийн хувьд Европын Холбоо болон Бүгд Найрамдах Чех Улсын хууль, тогтоомжийн дагуу Чехийн жолоодох эрхийн үнэмлэх, Мэргэшсэн жолооны үнэмлэх, Тахограф цахим үнэмлэхүүдийн авсны дараа том оврын тээврийн хэрэгсэл жолоодох эрх үүсдэг. Бүгд Найрамдах Чех Улсад хөдөлмөр эрхлэх гуравдагч улсын иргэн /үүний дотор Монгол Улсын иргэд/ том оврын тээврийн хэрэгсэл жолоодох зайлшгүй шаардлагатай тахограф цахим үнэмлэхийг Бүгд Найрамдах Чех Улсад хамгийн багадаа 185 хоног оршин суусны дараа мэдүүлэх эрхтэй болдог. Энэ нь том оврын тээврийн хэрэгслийн жолоочоор ажиллахаар ирж буй манай улсын иргэд тахограф цахим үнэмлэхийг автлаа хөдөлмөр эрхлэх боломжгүй гэсэн үг юм.
Иймд Бүгд Найрамдах Чех Улсад хөдөлмөр эрхлэхээр ирж буй иргэд Та бүхэн ажил олгогч байгууллага, компани, түүний үйл ажиллагааны талаар болон хөдөлмөрийн гэрээнийхээ зүйл заалттай сайтар танилцаж, зорьж ирж буй улсынхаа хууль, журам, нөхцөл байдлыг судалж, үүсч болох аливаа эрсдэлээс урьдчилан сэргийлэхийг зөвлөж байна.
